Зөвлөлтийн цэргийн нэр жанжин, маршал Фёдор Иванович Толбухин Москвагийн зүүн хойд нутгийн Ярослав мужид тариачин гэр бүлд мэндэлжээ. 1914 онд Эзэн хааны армид сайн дураараа элсэн орж Дэлхийн I дайнд тулалдаж байв. Эргэлт буцалгүйгээр цэргийн эгнээнд шилжсэн Толбухин 1916 онд Оросын эзэн хааны армийн ахмад цол хүртжээ.

1918 оны наймдугаар сард Толбухин Улаан Армийн эгнээнд элсч буудлагын 56 дугаар дивизийн штабын даргаар томилогдон улмаар 1921 онд Оросын Иргэний дайн дуусах үед дарга нь болсон байв. М.В.Фрунзийн нэрэмжит Цэргийн академид элсэн суралцаж байх хугацаандаа штабын бүрэлдэхүүнд дадлагажиж 1931 онд сургуулиа дүүргэсэн байна. 1937 онд Толбухин дивизийн командлагчаар томилогдон ажиллаж, дараа жил нь Өвөр Кавказын цэргийн тойргийн штабыг удирдах болсон байна.

Толбухин нацист Германы армийн "Барбаросс" ажиллагааг 1941 оны наймдугаар сард эхлэх хүртэл дээрх албан тушаалыг хашиж байгаад Крымийн фронтын штабын даргаар 1942 оны гуравдугаар сар хүртэл ажиллажээ.

1942 оны тавдугаар сараас долдугаар сарыг хүртэл Сталинградын цэргийн тойргийн командлагчийн туслахаар ажиллаж, улмаар 1943 оны гуравдугаар сарыг хүртэл 58 дугаар армийн командлагчийн албыг хашив.

 Маршал Василевский, маршал Толбухин нар фронтын байдалтай танилцаж байна.

58 дугаар арми тэр дундаа Толбухин онцгой үүрэгтэйгээр Сталинградын тулалдаанд оролцсон бөгөөд түүний командлалын бүрэлдэхүүн болон цэргийн ур чадвар онцгой байсныг хурандаа генерал Андрей Еременко сайшаасан нь бий. Дараа нь түүнийг 57 армийн командлагчаар томилсон бөгөөд удалгүй Өмнөд фронтын цэргийн командлагчаар томилсон байдаг.

1943 оны аравдугаар сард Өмнөд фронтыг Украины 4 дүгээр фронт болгон өөрчилсөн бөгөөд Родион Малиновскийгийн удирдсан Украины 3 дугаар фронттой хүч хавсран "Доод Днеприйн операци" болон "Днепр-Карпатын операци"-д тус тус томоохон үүрэгтэйгээр оролцож авьяаслаг жанжны ур чадвараа нотлон харуулжээ.

 Украины 3 дугаар фронтын штабын ажилтнууд командлагч Толбухины хамтаар

Толбухин 1944 оны тавдугаар сард Украины 3 дугаар фронтын командлагчаар томилогдон тухайн оны зургадугаар сараас аравдугаар сарыг хүртэл Малиновскийн цэргийн нэгтгэлтэй хамтран Балканы дайралт болон Румын, Болгарыг чөлөөлөх төлөвлөгөөг амжилттай хэрэгжүүлсэн байна. Ийн онцгой гавъяа байгуулсан Малиновский 1944 оны есдүгээр сарын 12-нд, Толбухин хоёр хоногийн дараа Зөвлөлт Холбоот улсын Маршал цолыг тус тус хүртсэн юм. Энэ завсар Малиновскийн нэгтгэл баруун хойд тал руу Австрийн зүг шилжиж, Болгарыг чөлөөлсөн Толбухины нэгтгэл Унгар болон Югослав тийш чиглэн тулалдаж тус тус чөлөөлсөн билээ.

Зөвлөлтийн 10 маршал. Эхний эгнээнд зүүнээс маршал И.Конев, маршал А.Василевский, маршал Г.Жуков, маршал К.Рокоссовский, маршал К.Мерецков, хоёрдугаар эгнээнд зүүнээс маршал Ф.Толбухин, маршал Р.Малиновский, маршал Л.Говоров, маршал А.Еременко, маршал Иван Баграмян нар.  

Дайны дараа Толбухин Өмнөд бүлгийн командлагчаар ажиллаж байгаад 1947 оны нэгдүгээр сард Өвөр Кавказын цэргийн тойргийн командлагчаар томилогдон 1949 оны аравдугаар сарын 17-нд таалал төгсөх хүртлээ уг албыг хашсан юм.