Өнөөдрөөс дөрвөн жилийн өмнө "Өглөөний сонин"-д Улсын ерөнхий прокурорын газрын Цагаатгал хариуцсан хяналтын прокурор Р.Мөнхтариатай хийсэн ярицлага нийтлэгдсэн юм. Их хэлмэгдүүлэлтийн үед яллагдсан Ёнзонхамба Лувсанхаймчигийн талаар ярилцжээ. Ярилцлагыг түүх сонирхогчдодоо сонирхуулж байна.
-Монголын түүхийн нэгэн эгшинд тод үлдсэн хүн бол Ёнзон хамба гэдэг. Энэ хүнийг цагаатгасныг хүмүүс янз бүрээр ярих нь бий. Харин цагаатгалын ажлыг гардаж хийсэн та уншигчдад өөрийгөө товчхон танилцуулахгүй юу?
-Би Прокурорын байгууллагад 30 гаруй жил ажиллаж байна. Үүнээс Улсын ерөнхий Прокурорын газрын Цагаатгал хариуцсан хяналтын прокуророор 10 шахам жил ажиллаж, 10-аад мянган хүний хэргийг Тагнуулын ерөнхий газар, Улсын дээд шүүхтэй хамтран шийдвэрлэсэн. Таны хэлсэнчлэн Ёнзон хамбыг цагаатгасан нь буруу гэсэн ярилцлага ганц нэг сонинд гарсан байсан. Гэхдээ уншигчдад үнэн зүйлийг мэдээлэх нь бидний үүрэг.
-Миний сонссоноор Ёнзон хамба Лувсанхаймчиг нь төвд хүн байсан гэх юм билээ?
-Төвдийн Үйзэн мужид 1872 онд төрсөн Цэдэн овогтой Лувсанхаймчиг нь бага наснаасаа бурхан шашны мөр хөөж, Төвдийн Дашлхүмбэ хийдэд сууж байгаад Банчинбогдын зарлигаар 1915 онд VIII богд Живзундамба хутагтын эрдмийн багшаар томилогдон Монголд ирж суурьшаад 1937 оны 9 дүгээр сард цаазлагдах хүртлээ 20 гаруй жил амьдарч байсан юм билээ. Богдын зарлигаар “Номч билэгт” гэдэг цолоор шагнагдсан нь, Жавти лам, Ёнзон гэсэнтэй ижил утга бүхий эрдэм номын цол нь.
-Шашны маш олон цол гуншин байдаг ч бид тэр бүр мэддэггүй л дээ. Харин танай цагаатгалын албаныхныг маш сайн мэддэг гэх юм билээ?
-Ер нь шашны эрдэм номын цол нь одоогийн шинжлэх ухааны доктор профессор гэдэг шиг хамба, гавьж, гэсгүй, гэвхүй, умзад, маарамба, дооромбо, зурхайч, авралч, гүрэмч гэх мэтийн шашны шинжлэх ухааны олон цол мяндаг тушаал бий. Эдгээр зэрэг зиндааг тусгайлан сурч судалсан эрдэм номоороо шалгарч авах жишээтэй. Ёнзон хамбын хувьд дээрх бүхнийг давж гарсан мяндагтан, одоогоор бол эрдэмтэн байсан юм билээ. Мөн богд Живзундамбыг агь тарнийн ухааны 10 боть, чойрын тав, арга мэдэхийн хаанаас нь ч асуухад торолгүй хариулж байсан гэдэг шүү дээ.
-Хэлмэгдүүлэлтээр хамгийн эрдэм чадалтай хүмүүсээ устгасан гэж хувьдаа боддог. Гэхдээ улс орноо төвхнүүлэхэд лам нарын оролцоо их басйан гэдэгтэй та санал нийлэх үү?
-Ардын хувьсгал ялж 1921 оны долоодугаар сарын 10-нд төр засаг байгуулагдах үед Живзундамба хутагтыг Монгол Улсын төрийн тэргүүн, хэмжээт эрхэт хаанаар, Байнгын Засгийн газрын ерөнхий сайд, Гадаад яамны тэргүүн сайдаар Д.Бодоо, Дотоод Яамны сайд байсан Манзушир хутагт Цэрэндоржийг өөрчилж Пунцагдоржийг, Д.Лосолыг Монгол Улсын бүх цэргийн лам бөгөөд цэрэг ардыг эмчлэх хорооны дарга, Дилав хутагт Жамсранжавыг Улиастайн сайдаар, Егүзэр хутагт Галсандашийг Зүүн хязгаарын сайдаар, лам Дэмчигийг Тагна Туваад суух сайдаар, лам Чагдаржавыг Богдын шадар сайд бөгөөд Монгол ардын харилцан туслалцах хоршооны даргаар тус тус томилж байсан нь Улс орноо хөгжүүлэх их үйлсийг анх эхлүүлэхэд лам нарын гүйцэтгэсэн улс төрийн үүрэг асар их бөгөөд тэдний эрдэм боловсрол, ард олны доторх нэр хүндийг харгалзсан нь мэдээж юм.
-Ёнзон хамба нарын хэргийг Шүүх яаж шийдвэрлэсэн болоод хүмүүс янз бүрийн юм яриад байгаа хэрэг вэ?
-1937 оны 9 дүгээр сард ЗСБНХУ-ын Дотоод явдлын яамны сайд Ежовоос, Монголд суугаа орлогч Фриновскийд илгээсэн цахилгаан мэдээндээ “Ёнзон хамба, дэд хамба Дамдин нарын мөрдөлтийг 10 хоногт дуусга!” гэснээр хууль бус баривчилгаа, мөрдөлт 1937 оны 9 сарын 10-нд эхэлсэн байдаг. Ёнзон хамбаар удирдуулсан “Хувьсгалын эсэргүү төв” байгууллага гэгчийн 23 хүний хэргийг Улсын Дээд шүүх таслах газраас 1937 оны 10 дугаар сарын 4-7-ны өдрийг хүртэл Бөмбөгөр ногоон театрт олны өмнө хийхдээ Шүүх Цаазын бичгийн ял төлөвлөгдсөн зүйл анги дээр 47 дугаар зүйлийг 7 хүнд нэмж ял шийтгэл оногдуулснаар 19 хүнийг дээд хэмжээгээр шийтгэсэн байсан.
-Тэгвэл Ёнзонхамба Лувсанхаймчиг нь Ванчин богд болон Английн тагнуул байсан, 1932 оны бослогыг удирдаж зохион байгуулсан нь нотлогдоогүй юм уу. Буруу цагаатгасан гэж сонинд гарсан байсан санагдана?
-Өндөр настан Зинамядар гэдэг хүн иймэрхүү зүйлийг сонинд бичсэн байсан. Тэр өвөө гол нь өөрийнхөө бичсэн гэх номонд байгаа зүйлүүдийг үнэн болгох гээд Шүүх Прокурорын байгууллагад удаа дараа өргөдөл гаргаад байгаа юм. Уг нь өөрөө ДЯЯ-ны улс төрийн ахмад ажилтан байсан хүн юм билээ. Өөрийнхөө бодол санааг бусадтай хуваалцаж байгаа 80 шахсан настныг хүндэтгээд хуулийн дагуу өргөдлүүдийнх нь хариуг өгсөн. Шүүх Прокурорын байгууллага хэрэгт байгаа баримтаар л шийдвэрлэнэ шүү дээ. Ёнзон хамба Лувсанхаймчиг нарын 23 хүний хэрэгт нь байгаа материалыг үзэхэд Ванчин богдын даалгавраар Ц.Лувсанхаймчиг Монгол оронд бурхан шашны номыг дэлгэрүүлэх, Ванчин богдыг ард олноор шүтэн бишрүүлэх захиа даалгавартай ирсэн байдаг. Энэ утгаараа холбоотой байсныг үгүйсгэх аргагүй. Үүргийнхээ дагуу бурхны номыг дэлгэрүүлэхэд, олон зуун лам хувраг, ард олонд шүтэгдсэн нэгэн байсан нь тодорхой юм. Ёнзон хамбатай хамт шийтгүүлсэн 23 лам бол Зинамядар гуайн бичсэн шиг төвдчүүд биш, дэд хамба Бутачийн Дамдин, Манзушир хутагт С.Цэрэндорж тэргүүтэй Төв, Хэнтий, Дорноговь, Архангай, Өвөрхангай зэрэг аймгийн харьяатууд байдаг.
Тэдгээрийн хэрэгт Ёнзон хамба Ванчин богд, Япон, Английн тагнуул байж ямар нэгэн үйлдэл хийж, үйл ажиллагаа явуулсан өчүүхэн ч баримт байдаггүй юм. Энэ талаар ДЯЯ-нд ч тухайн үед судлаад баримтжуулсан зүйл байхгүй юм билээ. Зөвхөн Ванчин богдоос Ёнзонхамбад ирүүлсэн таван удаагийн хувийн захидал байсныг 1937 онд орчуулахдаа, “Тагнуулын ажлыг” гүйцэтгэх тухай үг үгүүлбэрийг захидал бүрт оруулсан байхад 1961 онд Төв гандангийн хамба Гомбожав, МУИС-ийн Түвд хэлний багш гавьж Дорж нарын орчуулгад “тагнуулын” тухай нэг ч үг байдаггүй.
-Монголд Ванчин богд үнэхээр ирэх байсан юм болов уу. Түүнийг 1932 оны эсэргүү хөдөлгөөнийг гадаадаас удирдсан гэх ойлголт хүмүүст байдаг шүү дээ?
-Манай судлаачдын судалсанаар, Далай лам Түвдийг тусгаар улс байлгах, Ванчин богд Хятад улсын харьяанд оруулах асуудлаас болж улс төрийн үзэл бодлын таарамжгүй харилцаа гарч Ванчин богд 1921-1936 он хүртэл Хятадад очиж ӨвөрМонгол зэрэг газруудад байх үед нь Ёнзон хамба, Далай ламыг хаанд өргөмжлөгдөх үйл ажиллагаанд Монголоос очиж оролцоод буцахад нь Ванчин богд хамт Монголд ирэхээр хэл хүргээд Хятадын байдлаас болж ирж чадаагүй юм билээ. Тэр талаар Ёнзон хамбаас дуулж мэдсэн үг яриа нь лам хувраг болон сүсэгтэн олонд тарж заавал ирнэ гэсэн хүлээлт төрүүлж шашин сүм хийдийг устгах үед бүр ч хүчтэй яригдаж байсан хэрэг. Саж лам нарын 58, тайж Эрэгдэндагва нарын 38 хүний хэрэг, Төгсбуянт, Улаангомын лам нарын тэмцэл нь 1932 оны Эсэргүү хөдөлгөөнөөс өмнө гарч байсан. Энэ бүхнээс үзэхэд заавал гадаадаас удирдаж зохион байгуулагдсан байх ёстой гээд туйлшрах шаардлагагүй. Ванчин богд ч юмуу Япон, Англиас тодорхой удирдамж заавар Лувсанхаймчигт өгөөд тэр нь бослого хөдөлгөөнийг удирдсан, зохион байгуулсан гэх ямарч нотлох баримт байдаггүй юм.
-Зинамядар гуайн бичсэнээр Ёнзонхамба Ванчин Богд нарын тагнуулын тухай захидлыг Агваанжамъян, Батын Содов гэдэг лам нар зөөж байснаа гэрчилсэн гэдэг?
-Дорнод аймгийн Дэчин гэгээний хийдийн хамба Буян-Оршихын Агваанжамъянг Хувьсгалын эсэргүү, төвийн нууц хурлыг удирдаж хийсэн идэвхтэй гишүүн гэж 1936 оны дөрөвдүгээр сарын 3 нд буудан хөнөөсөн. Энэ тухай нотлож тогтоосон баримт хэрэгт нь байдаггүй. Бас Ёнзон хамбатай тагнуулын харилцаатай байсан гэдэг нь Жамъянтивтэй хамт хоригдож байсан Түдэвийн Шархүүг гэрчилсэн гэх боловч судлахад Шархүү нь тэр үед тэнд биш Засан Сайжруулахад ял эдэлж байсан нь тогтоогдсон. Жамъянтивийг цаазлахын урд өдөр нь авсан Ёнзон хамбатай тагнуулын харилцаатай байсан тухай мэдүүлэгт “Би тэгвэл огт сонсоогүй зүйлийг сонссон мэтээр мэдүүлье” гэснээс үзэхэд шахалтаар худал мэдүүлэг гаргуулсан нь тодорхой харагддаг. Хуулийн байгууллага хэрэгт байгаа баримт материалыг үндэслэж шийдвэрлэдэг болохоос хэн нэгэн хүний хийсвэрлэсэн бодол санаа, судлаач эрдэмтдийн бүтээлийн үнэн эсэхийг шалгах, хянах, дүгнэлт гаргах үүрэг байдаггүй.
-Ёнзон хамбаар удирдуулсан лам нарын “Хувьсгалын эсэргүү төв”-ийн хэргийг хуулийн байгууллагууд цагаатгахдаа холбогдох хэргийн материалуудыг судлахаас гадна, Дотоод Явдлын Яаманд хэлтэс тасгийн дарга, мөрдөн байцаагч, төлөөлөгчөөр ажиллаж хуулийг завхруулж худал зохиомол хэрэгт олон хүнийг гүтгэж, амь биеэр нь хохироосон байдаг. Хожим нь ял шийтгүүлсэн олон ажилтнуудын хэрэгт байгаа мэдүүлэг бусад олон баримтыг үзэж, амьд сэрүүн 24 хүнтэй уулзаж тайлбар тодорхойлолт гаргуулсан гэдэг?
-Ёнзонхамба нарын 23 хүний хэрэгт байгаа 19 хүний давтан мэдүүлгийн гарын үсгийг шинжлүүлэхэд биш болох нь тогтоогдож, Ёнзон хамбаар удирдуулсан хот хөдөөгийн “Хувьсгалын эсэргүү лам нарын төв”-ийн салбар байсан эсэхийг Нийгмийг Хамгаалах Яамнаас 18 аймаг хоёр хотын хэлтсээр дамжуулан судлуулж тэр үед лам байсан 16 хүнтэй уулзаж ярилцахад албан ёсны салбарууд байгаагүй болохыг нотлож мэдүүлсэн байгаа юм. Энэ бүхнээс дүгнэлт хийгээд, Ёнзон хамба Лувсанхаймчигаар удирдуулсан, “Хувьсгалын эсэргүү лам нарын төв“ Гэндэн, Дэмид нарын удирдсан “Хувьсгалын эсэргүү японы тагнуулын байгууллага“ гэсэн байгууллагууд албан ёсоор зохион байгуулагдаж үйл ажиллагаагаа нэгтгэн явуулж байсан гэх хууль ёсны нотлох баримтгүйгээр, хууль ёсыг зөрчиж хоморголон баривчилсан, мөрдөлт явуулсан, зөвхөн сэжиг таавраар ял шийтгэл оногдуулсан нь үндэслэлгүй гэж НАХЯ-ны гаргасан дүгнэлт, Улсын ерөнхий Прокурорын 1990 оны 05 сарын 09-ний өдрийн бичсэн эсэргүүцлийг үндэслэж, Улсын Дээд шүүхийн Бүгд Хурлын 1990 оны 7 дугаар сарын 25-ны өдрийн тогтоолоор хэргийг хэрэгсэхгүй болгож Ёнзон хамба нарын хэргийг цагаатгасан нь хуульд заасан эцсийн шийдвэр бөгөөд, хуулийн бүрэн үндэслэлтэй гэдгийг хэлэх байна даа.
-Тэгэхээр энэ хэргийг цагаатгасанаар түүхийг гуйвуулах биш харин ч хэлмэгдсэн 17 мянга гаруй лам хуврагыг цагаатгаж нэр төрийг нь сэргээсэн гэсэн үг үү?
-Тийм, бас Коминтерний удирдамж заавраар ДЯЯ-ны үйл ажиллагаанд гарсан алдаа завхралаас болж улс төрийн хэлмэгдүүлэлт гэдэг аймшигт зүйл болсон гэдэг нь нэгэнт тогтоогдож түүхэнд үлдсэнтэй хэн ч маргаад ач холбогдолгүй зүйл л дээ. Цагаатгалын тусгай хуулийг батлан гаргаж хэрэгжүүлсэний үр дүнд улстөрийн хилс хэрэгт хэлмэгдсэн 30 гаруй мянган хүнийг цагаатгаж нэр төрийг нь сэргээх ажлыг Цагаатгалын Улсын Комисс болон хууль хяналтын байгууллагууд хамтарч зохих ёсоор хийж байгаа. Энэ бол дээрх хуулийн ач холбогдол төдийгүй төрөөс хэрэгжүүлж байгаа зөв зүйтэй чухал ажил юм.
-Цагаатгалын хуулийн хугацаа нь дуусаагүй гэх ч өргөдөл гаргах, нөхөн олговор олгох хугацаа нь дууссанд иргэд нэлээн бухимдаж буй нь ажиглагддаг?
-Хуулийн хугацаа дуусаагүй, зөвхөн нэхэмжлэгчийн өргөдөл гаргах, нөхөн олговроо олж авах гэсэн гол хоёр заалтын хугацаа нь 2011 оны 12 сарын 30-нд дууссан. Үүнээс үүдэн хөдөлмөрчдийн өргөдлийг хүлээж авч шийдвэрлэх боломжгүй тул буцааж байгаа. Энэ тухай бид хуулийн төсөл боловсруулж холбогдох газарт хүргүүлсэн. Удахгүй УИХ-аар хэлэлцэж шийдвэрлэх байх гэж хүлээж байгаа.
Ярилцсан С.Туул