Авхиа гуай аварга, арслан заануудтай хүчийг үзсэн нь

УЦСЕГ-ын дарга, Ерөнхий прокурор, БХЯ-ны сайд явсан Ж.Авхиа гуайн бөхийн ертөнцөд үлдээсэн мөр.

Жарантайн Авхиа хэмээх манай улсын цэрэг, хуулийн байгууллагын түүх намтартай салшгүй холбоотой нэгэн буурал байв. Тэрбээр УЦСЕГ-ын дарга, БНМАУ-ын Ерөнхий прокурор, БХЯ-ны сайдын албыг хашсан тэр эрхэм бөхийн хорхойтон төдийгүй бага залуу наснаас ноцолдож улсын начин цол хүртсэн сайн бөх юм. Тэрээр өөрийн дурсамж номондоо үндэсний бөхөөр хэрхэн барилдаж, улсын начин цолыг гарвантаа баталсан тухайгаа, аварга арслан заануудтай хүчийг сорьж явсан тухайгаа ийн дурсжээ.

Би мэдээ орсон цагаасаа үеийн багачуудтайгаа хөдсөн дээл, хөмөн гутлаа уран, унасан ч, хаясан ч үргэлж барилддаг байв. Аавыгаа даган хаана бөх барилдана түүнийг алгасалгүй үздэг байлаа. Бөхийн тухай хууч яриа их сонирхдог, уран мэх угсруулан хийхийг тун их хичээдэг хүүхэд байв. Бас хүч тамир шаардсан ажил хөдөлмөрт оролцох дуртай байсан нь багаас бяр тэнхээ, хурд хүчтэй болоход минь нөлөөлсөн ч байж болох юм. Арван таван нас хүрэхдээ үеийнхнээсээ их өсгөлүүн хүүхэд байсан учир овооны наадамд анх томчуулын аманд гарч барилдав. Арван наймтайдаа Шарга сумынхаа наадмын шигшээ барилдаанд түрүүлж, анх удаа аавыгаа баярлуулж байлаа.