Чингис хааны булш хаана байна вэ? Найман зуун жилийн эрэл

Хүн төрөлхтний түүхэн дэх хамгийн их газар нутгийг эзэлсэн хааны мөнхийн нойрсох газар өнөөг хүртэл олдоогүй. Ганц модны домог, Их хориг, гадаадын экспедицүүд, мөн «хайх ёстой юу» гэсэн маргаан.

Хэнтийн нурууны Бурхан Халдун уул. Чингис хааны булш энэ уулын орчимд байх магадлалтай гэж олон судлаач үздэг.

Монголын нутгаас хэдэн арван экспедиц, хиймэл дагуул, нисгэгчгүй онгоц, газар нэвтлэх радар, хэдэн сая долларын хөрөнгө зарцуулсан ч өнөөг хүртэл олдоогүй нэгэн булш бий. Энэ бол хүн төрөлхтний түүхэн дэх хамгийн их газар нутгийг эзэлсэн эзэнт гүрнийг үндэслэгч Чингис хааны мөнхийн нойрсох газар юм.

Найман зуу орчим жилийн өмнө түүнийг оршуулсан хүмүүс энэ нууцыг хадгалахын тулд бүхнийг хийсэн бөгөөд тэдний хүсэл одоо хэр нь биелсээр байна. Харин өнөөгийн монголчуудын олонх нь энэ нууц цаашид ч ингэж хадгалагдах ёстой гэж үздэг.

Гахай жилийн зун

Чингис хаан 1227 оны зун, Тангуд улсыг эцэслэн мөхөөх аяны үеэр тэнгэрт хальсан юм. «Монголын нууц товчоо»-нд өгүүлснээр тэр өмнөх өвөл Арбуха хэмээх газар зэрлэг адуу агнаж явахдаа мориноосоо унаж, хүнд бэртсэн бөгөөд халуурч өвдсөн хэдий ч аяныг зогсоолгүй үргэлжлүүлсээр байжээ. Гэвч «Нууц товчоо» түүний оршуулгын тухай нэг ч үг үлдээгээгүй нь санамсаргүй хэрэг биш байх.