Дэлхийг аварсан Америк офицер

Нийтлэлч Чалчаа саарал

Дэлхийг аварсан хүн гэхээр ЗХУ-ын иргэн Станислав Петровын тухай их ярьдаг. 1983 оны нэгэн өдөр Серпухов-15 гэсэн нэртэй нууц төвийн хяналтын жижүүр хийж байсан Петров нь АНУ-ын нутаг дэвсгэрээс цөмийн, тив алгасах пуужинг ЗХУ-ын нутаг дэвсгэр лүү харвалаа гэсэн системийн (элдэв мэдрэгч бүхий хиймэл дагуулын, компьютер тооцооллын нэгдсэн мэдээ) мэдээллийг аваад , нөхцөл байдалд дүн шинжилгээ хийсний дүнд энэ нь цөмийн дайралт биш техникийн алдаа байна гэж мэдсэн гэдэг. Энэ явдал дараа нь ил болж, Петровын ачаар хүн төрөлхтөн цөмийн дайнаас аврагдсан билээ гэсэн утгатай зүйл интернетээр дүүрэн бий. Хүйтэн дайн дууссаны дараа энэ хүний алдар нэр ингэж тарсан бөгөөд барууны хэвлэл мэдээлэл үүнийг хамгийн их тарааж, магтан шагшиж байсан юм. Петровын тухай, дээрх явдлын тухай олон баримтат кино хийгдсэн байгаад саяхан бүр “Дэлхийг аварсан хүн” (The Man Who Saved the World)  гэсэн уран сайхны кино ч гарсан байдаг.