Дөрвөн цагаан өдний хийрхэл

 Нийтлэлч Чалчаа саарал

Их Британид аль эртний хүлэг баатрын үеэс уламжлан ирсэн нэгэн заншил байдаг нь аймхай хулчгараа харуулсан хүнд 4 цагаан өд өгдөг явдал байж. Он жилийн явцад энэ зан заншил бараг мартагдаж байсан тэр үед буюу 1902 онд  “Дөрвөн өд” хэмээх зохиол хэвлэгдэн гарч өөдгүй муусайн хүмүүсийг ингэж тэмдэглэж, шившиглэж байжээ гэдгийг эргэн сануулжээ.

1914 он болж дэлхийн их дайн эхэллээ. Британийн эзэнт гүрэн даяар эх оронч үзэл газар авч, цэрэгт сайн дураар явж улс орныхоо эрх ашгийг хамгаалах гэсэн хүмүүс цэрэг татлагын газар ёстой л овоорч байсан бөгөөд тухайн үед нэмэлтээр 100 000 гаруй цэрэг татахад л хангалттай гэж тооцож байсан гэдэг.