Хамгийн баян хүн

 Хүний халаасан дахь мөнгийг тоолох гэдэг нэг сонирхолтой ажил бий. Одоогийн байдлаар ихэнх “мөнгө тоологчид нь” (форбес гэх мэт) дэлхийн хамгийн баян хүнээр Илон Маскийг нэрлэж байгаа бөгөөд түүний хөрөнгө чинээг ойролцоогоор 240 тэрбум доллар гэж үздэг. Яахав зарим нэг нь Рокфеллер, Генри Форд, Ротшильдын гэр бүл... гэх мэтээр ярьж, тэдний хөрөнгө мөнгийг өнөө цагийн хэмжүүрээр хэмжиж тооцдог явдал бий. Гэхдээ ингэлээ ч тэдний хөрөнгө одоогийн тэр 240 тэрбум хүрэх нь юу л бол. 

Цаг хугацаа явах хэрээр баялаг ихээр нэмэгдэж түүнийг дагаж баян тарган хүний тоо хэмжээ, хөрөнгө нь нэмэгддэг гэсэн ойлголтоор бол Илон Маск нь дэлхийн түүхэн дэх хамгийн баян хүн гэж нэрлэж болмоор санагдаж болох юм. Гэтэл үнэндээ дэлхийн түүхэн дэх хамгийн баян хүн нь XIV зууны үед баруун Африкийн Мали эзэнт гүрний хаан манса Муса гээч байсан гэдэг билээ.