Квантуны армийг буулгаж авсан зальт эр

1945 оны 8-р сарын 14 ний өдөр Японы жанжин штаб нь эзэн хааны нэрийн өмнөөс гал зогсоож байгаагаа мэдэгдэн, Японы бүх зэвсэгт хүчнийг бууж өгөхийг тушаасан билээ. Гэсэн хэдий ч дайн дуусаагүй төдийгүй Квантуны арми зэрэг асар хүчтэй бүлэглэлүүдийн эсэргүүцэл улам бүр улангассан хэлбэртэй болж, ширүүсэж байсан ба тэдгээр бүлэглэлүүдийн хувьд бууж өгнө гэдэг хамгийн шившигтэй хэрэг байв.

Энэ цаг үед Алс Дорнодын фронтын командлагч Малиновский нь 8-р сарын 19 ний өдөр өөрийн хэлэлцээ хийх бүлгийг Квантуны армийн төв штаб руу нисгэсэн нь ёстой аз туршсан хэрэг байлаа. Япончуудыг буулгаж авах тухай хэлэлцээ эхлүүлэх ёстой дээрх бүлгийг “самурайнууд” яаж ч магадгүй байсан боловч Зөвлөлт болон Монголын олон мянган цэргийн амь үрэгдэхээс сэргийлэхийн тулд оролдоод үзэхээс өөр арга байгаагүй гэдэг.