Ж.Лхагвасүрэн жанжинг сайдаас чөлөөлсөн тухай нэгэн дурдатгал

Дэслэгч генерал Д.Ёндондүйчирийн дурдатгал. Монголын цэргийн түүхийн олонд мэдэгддэггүй нэгэн хуудас.

Зүүн гараас: МАА-ийн Улс Төрийн газрын дарга, дэслэгч генерал Д. Ёндондүйчир, БНМАУ-ын баатар, БХЯ-ны нэгдүгээр орлогч сайд, хурандаа генерал Б. Цог, БХЯ-ны нэгдүгээр орлогч сайд, МАА-ийн Жанжин Штабын дарга, хошууч генерал Ч. Пүрэвдорж нар

Өвөрхангай аймгийн Зүүнбаян-Улаан суманд 1921 онд төрсөн, Монголын цэргийн зүтгэлтэн, дэслэгч генерал Дондовын Ёндондүйчир агсны дурдатгал, дурсамжийн хэсгээс History.mn (Tolgoilogch.mn) сайт уншигчиддаа сонирхуулж байна. Чингэхдээ БНМАУ-ын Батлан хамгаалахын гурван сайдтай хамтран ажиллаж байсан үеийнх нь түүхээс онцлон түүвэрлэлээ. Д.Ёндондүйчир гуай 1960-1969 онд БНМАУ-ын прокурор, 1969-1982 онд Ардын Армийн Улс төрийн газрын даргаар ажиллаж байжээ. Монголд байрлаж байсан Зөвлөлтийн Өвөр Байгалийн Ерөнхий цэргийн 39-р армийн командлагч, Сүхбаатарын нэрэмжит "Хувьсгалт Монгол" танкийн бригадын ахмад дайчин, ЗХУ-ын Баатар, дэслэгч генерал Г.С.Петровскийг 1978 онд БНМАУ-ын АИХ-ын Тэргүүлэгчдийн зарлигаар Байлдааны гавъяаны одонгоор шагнасны дараа БХЯ-ны удирдлага хүлээн авч уулзах үеэр энэ гэрэл зургийг татуулжээ.