Өөрийн хотоо бөмбөгдсөн нь

Нийтлэлч Чалчаа саарал

Агаарын осол гэмтлийн тухай дэндүү их юм бичсэн болохоор, энэ хүндхэн сэтгэл санаатай байгаа цаг үед бас л осол эндэгдэл боловч азаар гэм хор багатай гэх үү тийм үйл явдлын тухай сонирхуулах гэсэн юм.

Өөрийн хотыг бөмбөгдсөн нь

1943 оны 6-р сарын орой АНУ-ын нисэх хүчний Далхарт хэмээх буудлаас 4 B-17 онгоц шөнийн бөмбөгдөлт хийх сургууль хийхээр агаарт гарсан байна. Төлөвлөгөөгөөр бол эдгээр нисдэг цайзууд холгүй орших буудлагын талбайн дээр очиж Х үсгийн хэлбэртэй гэрэл бүхий байг бөмбөгдөх ёстой байж. Сүйд болох юмгүй жирийн л нэг сургуулилалт.

Хөтлөгч онгоцны шинэхэн штурман эр дайрах ёстой байгаа чиглэн явж байхдаа арай хойгуур, 40 миль орчим зайтай зөрөхөөр явж байгаагаа анзаарсангүй. Яг шөнө дундын үед нисэж яваа онгоцнуудад X хэлбэртэй гэрэл харагдаж онгоцны дарга бөмбөг хаяхад бэлтгэх тушаал өглөө. Ямар ч хүн байлдааны даалгавар өгч байхдаа өөрийн эрхгүй дотор нь буцалж, эр зориг нэмэгддэг гэдэг, мань эрийнх бүр арай илүү буцалсан шиг бололтой.