Шанель: Алдар хүндээр халхлагдсан бараан түүх

Коко Шанель хэмээх бүсгүй эмэгтэйчүүдийн хувцас загварын ертөнцөд хувьсгал хийсэн тухай яриад ч хэрэггүй, хүн бүхний л мэдэх хэрэг. Тэр тусмаа түүний нэрээр нэрлэсэн Шанель№5 хэмээх үнэртэй усны тухайд ёстой бичээгүй сэтгүүлч, яриагүй мэргэжилтэн гэж загварын ертөнцөд үгүй юм гэнэ лээ.

Гэхдээ энэ их алдар хүндийн цаана тун ч тааруухан бараан түүх нуугдаж байдгийг харин тэр болгон мэдэхгүй биз ээ.

Хар багаасаа ядуу зүдүү өссөн бүсгүй нь амьдрахын тулд, хүн шиг байхын тулд юуг ч хэзээ ч худалдахад бэлэн хүн болж өссөн байна. Янз бүрийн арга замаар багагүй мөнгө олж, хүний өмнө зовохооргүй хувцас хунар өмсөх боломжтой болонгуутаа Английн дээдсийн хүрээлэнд багтахаар ажиллаж удалгүй Черчилль, Уэльсийн хунтайж нартай найз нөхөд болж, тэд нараар дамжуулан язгууртан Хью Ричард Артур Гросвенортой (тухайн үеийн Британийн хамгийн баян хүн) амрагийн холбоо тогтоосон үе бол 1920-оод он.