Сент-Хеленс галт уулын дэлбэрэлт

АНУ-ын Вашингтон мужийн Скамания хэмээх тойрогт байрлах Сент-Хеленс галт уул 123 жилийн дараа сэрж, ойр ойрхон газар хөдөлж эхэлсэн үе бол 1980 оны 3-р сар байлаа. Иймэрхүү ойр ойрхон газар хөдлөх нь уг галт уул маш хүчтэй оргилон тэсрэх шинж тэмдэг гэж хэвлэл мэдээллээр шуугьж эхэлсэн байна. Удалгүй уулын тогооноос үнс хий оргилон гарч эхлэхэд галт уул судлаач нар, жирийн сонирхогч хүмүүс байгалийн бас нэг аймшигт том үзэгдлийг судлах, үзэх гэж цуглаж эхэлжээ. 4-р сарын турш үнс нурам оргилсоор байснаа гэнэт зогсож чимээгүй болсон ч уулын хойд хэсэг бага багаар, өдөр болгон л нэмэгдэн 200 гаруй метр дээшилсэн нь яг л хөөс томорч байгаа мэт өндөрсөж байсан гэдэг (өдөрт 1,5 метр орчим). Гэсэн ч галт уулын магм урсан гарч ирэхгүй байгаа нь уг галт уулын тогооны дээд хэсэг өмнө нь цацсан, хатуурч бэхэжсэн лаваар битүүрсэнтэй холбоотой байж. Магм улам бүр хуралдаж байсан учраас уулын доторх даралт ч өдөр ирэх тутам нэмэгдсээр.